पोखरा । आठौँ पोखरा स्पोर्ट्स अवार्डमा क्रिकेटका अर्जुन कुमाल र आईटीएफ तेक्वान्दोकी सुस्मिता थापामगरले वर्ष उत्कृष्ट खेलाडीको अवार्ड जितेका छन् ।
नेपाल खेलकुद पत्रकार मञ्च गण्डकीले शुक्रबार पोखरामा आयोजना गरेको अवार्डमा पुरुषतर्फ अर्जुन र महिलातर्फ सुस्मिता वर्ष खेलाडी घोषित हुँदै जनही एक/एक थान स्कुटर, ट्रफी र मेडल पुरस्कार प्राप्त गरे ।
उत्कृष्ट प्रशिक्षकको अवार्ड भलिबलका रमेश केसीले प्राप्त गरे । उनले नगद ३५ हजार रुपैयाँसहित ट्रफी पुरस्कार पाए ।
यसैगरी, १७ वर्षमुनिका खेलाडीबीच प्रतिस्पर्धा हुने उदीयमान खेलाडी विधाको अवार्ड ब्याडमिन्टनकी दिलासा रानामगरले प्राप्त गरिन् । उनले अवार्डसँगै नगद ३५ हजार र ट्रफी र मेडल पाइन् ।
‘लाइफटाइम अचिभमेन्ट अवार्ड’ एथलेटिक्सका प्रशिक्षक इन्द्रा मल्लले प्राप्त गरिन् । उनलाई चाँदीको करुवा, ट्रफी, ताम्रपत्र र दोसल्लाले सम्मान गरिएको थियो । वर्ष उत्कृष्ट खेल संस्था वा क्लबतर्फको अवार्डबाट सहारा क्लब पोखरा सम्मानित भयो ।
यस्तै, वर्ष उत्कृष्ट खेल पत्रकारतर्फको अवार्डबाट पत्रकार रोहितराज पराजुली सम्मानित भए । वर्ष उत्कृष्ट खेलकुद संस्था वा क्लब र वर्ष उत्कृष्ट पत्रकारतर्फका अवार्ड विजेताले नगद ३५ हजारका साथमा अवार्ड पुरस्कार पाए ।
ओलम्पियन खेलाडी नारायण गुरुङ र टेनिसको अन्तर्राष्ट्रिय वरियता प्राप्त खेलाडी अभिषेक बाँस्तोलालाई विशेष अवार्डबाट सम्मान गरिएको थियो । मञ्चले विभिन्न सात विधामा अवार्ड वितरण गरेको हो ।
गण्डकी प्रदेशका मुख्यमन्त्री खगराज अधिकारी, आर्थिक मामिला तथा योजनामन्त्री हरिबहादुर चुमान, सामाजिक विकास तथा स्वास्थ्यमन्त्री सीता सुन्दास, पोखरा महानगरपालिकाका प्रमुख धनराज आचार्य, उपप्रमुख मञ्जुदेवी गुरुङ, मञ्चका अध्यक्ष दीननाथ बराललगायतले विजेतालाई ट्रफी, नगद र प्रमाणपत्र पुरस्कार प्रदान गरेका थिए ।
खेलकुद क्षेत्रमा लागेर देशका लागि योगदान दिने खेलाडी, खेल संघसंस्था लगायतलाई प्रोत्साहित गर्नका लागि मञ्चले हरेक वर्ष अवार्ड प्रदान गर्दै आएको छ । अवार्ड कार्यक्रममा गण्डकी प्रदेश सरकारको विशेष सहयोग तथा प्रदेश खेलकुद परिषद् गण्डकीले सहकार्य गरेको थियो । खेलकुद विधामा विशेषगरी कलम चलाउँदै आएका ७४ जना पत्रकार हाल मञ्चमा आबद्ध रहेका छन् ।
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
-1731591869.jpg)
