कास्की । फुटबल एकेडेमी र प्रतियोगिता सञ्चालन गरी फुटबल खेल विकासमा क्रियाशील पोखराको सहारा क्लबलाई यस वर्षको उत्कृष्ट खेलकुद संघ अवार्ड प्रदान गरिने भएको छ ।
नेपाल खेलकुद पत्रकार मञ्च गण्डकीले आठौँ संस्करणको ‘पोखरा स्पोर्ट्स अवार्ड–२०८०’मा सहारालाई सो अवार्ड प्रदान गर्ने निर्णय गरेको हो ।
छैटौँ संस्करणसम्म यस विधाअन्तर्गतको अवार्ड खेलसम्बन्धी संघलाई मात्र प्रदान गरिँदै आएकामा सातौँ संस्करणदेखि खेल संघ वा क्लबमध्येबाट उत्कृष्ट छान्ने व्यवस्था गरिएको थियो । यो अवार्ड पाउने सहारा पहिलो क्लब बन्न सफल भएको मञ्चका महासचिव राजाराम पौडेलले जानकारी दिए ।
वैशाख २८ गते पोखरा सभागृहमा आयोजित समारोहमा अवार्ड प्रदान गरिनेछ । २०५५ भदौमा ‘आत्मा साक्षी राखी मन, वचन र कर्मले सामाजिक सेवामा सेवा गरौँ’ भन्ने नाराका साथ स्थापित क्लब स्वदेशसँगै विदेशसम्म फैलिएको छ ।
स्थापनादेखि उक्त क्लबले निरन्तर खेलकुद र सामाजिक कार्यमा क्रियाशील रहँदै आएको छ । २०५६ सालमा पृथ्वीचोकमा सार्वजनिक शौचालय निर्माण गरेर सामाजिक कार्यको सुरुआत गरेको क्लबले २०५७ सालमा ‘सहारा कप’ क्लबस्तरीय ‘लिग कम नकआउट फुटबल’ प्रतियोगिता सञ्चालन गरेको थियो ।
२०५८ मा ‘क्याराभान गोल्डकप फुटबल’ प्रतियोगिता आयोजना गरेको क्लबले त्यसपछि प्रत्येक वर्ष राष्ट्रिय तथा अन्तर्राष्ट्रिय अन्तर क्लब आमन्त्रित आहा रारा गोल्डकप फुटबल प्रतियोगिता आयोजना गरिरहेको छ । हालसम्म २३औँ संस्करण सम्पन्न भइसकेको छ ।
पोखरा तथा यस आसपासमा फुटबल खेलतर्फको रौनकता बढाउन यो प्रतियोगिताले महत्त्वपूर्ण भूमिका खेल्दै आएको छ । असहज समयमा समेत यस प्रतियोगितालाई निरन्तरता दिएकाले क्लबले फुटबल खेलको क्षेत्रमा अब्बल क्लबको रूपमा आफूलाई स्थापित गर्न सफल भएको छ ।
सहाराले २०६९ सालदेखि सहारा फुटबल एकेडेमी सञ्चालन गर्दै आएको छ । एकेडेमीमार्फत क्लबले अनाथ तथा असहाय बालबालिकालाई पालनपोषणका साथमा फुटबलसमेत सिकाउँदै आइरहेको छ ।
अवार्ड कार्यक्रममा वर्ष उत्कृष्ट खेलकुद संघसंस्था वा क्लबसँगै, वर्ष उत्कृष्ट प्रशिक्षक, लाइफटाइम अचिभमेन्ट अवार्ड, वर्ष खेलाडी पुरुष, वर्ष खेलाडी महिला, वर्ष उदीयमान खेलाडी र वर्ष उत्कृष्ट खेल पत्रकारलाई अवार्ड प्रदान गरिने मञ्चका अध्यक्ष दीनानाथ बरालले जानकारी दिए ।
यसैगरी मञ्चले सर्वोत्कृष्ट महिला र पुरुष विधामा अवार्ड प्राप्त गर्नेलाई अवार्डसँगै एक/एक थान टेलजी इलेक्ट्रिक स्कुटर प्रदान गर्ने जनाएको छ । साथै अन्य सबै विधामा अवार्ड प्राप्त गर्नेलाई अवार्डसँगै जनही ३५/३५ हजार रुपैयाँ प्रदान गरिने मञ्चले जनाएको छ ।
![पाँच नेपाली युवाको लगानीमा बेलायतमा भीपी स्टोर सञ्चालनमा [भिडियोसहित]](https://gurkhamedia.com/uploads/posts/Messenger_creation_4DD3141E-54DA-464A-9F31-4577973ABA16-1731687830.jpeg)
-1731591869.jpg)
![धामीको चरित्र निभाउन सजिलोचाहिँ पक्कै थिएन : माओत्से गुरुङ [अन्तर्वार्ता]](https://gurkhamedia.com/uploads/posts/Messenger_creation_82D7EC6F-80A8-442C-BA30-03CBBA0D96F7-1731684941.jpeg)
