लमजुङ जिप दुर्घटना: एक महिलाको मृत्यु, ८ घाइते

मातृभूमि नेपाल

Home
मातृभूमि नेपाल
लमजुङ जिप दुर्घटना: एक महिलाको मृत्यु, ८ घाइते

लमजुङ जिप दुर्घटना: एक महिलाको मृत्यु, ८ घाइते

गोर्खा मिडिया संवाददाता बिहीबार, पुस १४, २०७९

बेंसीशहर । लमजुङको बेंसीशहरबाट मस्र्याङदी गाउँपालिका ८ भुस्मेतर्फ जाँदै गरेको ग ३ च ८३६१ नम्बरको बोलेरो जिप बिहीबार साँझ ५ बजेतरि मस्र्याङदी गाउँपालिका ८ भुलभुलेमा दुर्घटना हुँदा भुस्मेकी ४७ बर्षीया भिवकाशी तामाङको मृत्यु भएको हो । जिपमा च्यापिएकी तामाङलाई उपचारका लागि लमजुङ जिल्ला अस्पतालमा ल्याउँदा डाक्टरले मृत घोषणा गरेको प्रहरीले जनाएको छ । घटनास्थलमै उनको मृत्यु भएको हुनसक्ने प्रहरीले जनाएको छ । उनको शव पोष्टमार्टमका लागि अस्पतालमा राखिएको छ ।
उक्त जिप उकालोमा ब्रेक फेल हुदाँ बाटोबाट अन्दाजी १० मिटर तल खसेको जिल्ला प्रहरी कार्यालय लमजुङका प्रहरी निरीक्षक बुद्धिप्रसाद सुवेदीले बताए । उनका अनुसार जिपमा चालकसहित १० जना सवार थिए । घाइते ८ जनाको उपचार भइरहेकोमा ४ जनालाई उपचारका लागि नयाँ मेडिकल कलेज चितवन रिफर गरिएको छ ।
मस्र्याङदी गाउँपालिका ८ रिङटाङका अन्दाजी २० बर्षीया उर्मिला गुरुङ, सोही ठाउँका २१ बर्षीया रिता गुरुङ, ३० बर्षीया मनमाया तामाङ, ३२ बर्षीया सीता गुरुङलाई रिफर गरिएको प्रहरीले जनाएको छ । उनीहरुको अवस्था मध्यम छ ।
यस्तै, भुस्मेका १३ बर्षीय बालक राज तामाङ, १३ बर्षीय बालक हिमाल तामाङ, २८ बर्षीया काशी तामाङ र ओखलढुङ्गा खिजिबिम्बा गाउँपालिका ७ का ६३ बर्षीया कुमारी गुरुङको लमजुङ जिल्ला अस्पतालमा उपचार भइरहेको छ ।
घटनास्थलमा प्रहरी चौकी खुदीका प्रहरी बरिष्ठ हवल्दार रमेश खड्काको कमाण्डमा ५ जना र जिल्ला प्रहरी कार्यालय लमजुङबाट प्रहरी सहायक निरीक्षक नरसिंह नारायण यादवको कमाण्डमा ७ जना खटिएका थिए । जिपका चालक फरार रहेको र खोजी कार्य भइरहेको प्रहरीले जनाएको छ । जिप घटना स्थलमा नै रहेको प्रहरीले जनाएको छ ।

प्रकाशित मिति: बिहीबार, पुस १४, २०७९ २०:२१

प्रतिक्रिया दिनुहोस्